యష్ రాజ్ ఫిల్మ్స్ ‘ఆల్ఫా’ రిలీజ్ ఎప్పుడంటే?

హిందీ సినీ ప్రపంచంలో ప్రముఖ నిర్మాణ సంస్థ అయిన యష్ రాజ్ ఫిల్మ్స్ తమ ప్రతిష్టాత్మక స్పై యూనివర్స్‌లో రూపొందుతున్న కొత్త చిత్రం ‘ఆల్ఫా’ విడుదల తేదీని అధికారికంగా ప్రకటించింది. ఈ చిత్రం 2026 జూలై 10న ప్రపంచవ్యాప్తంగా థియేటర్లలో విడుదల కానుంది.

హిందీ సినిమాల్లో మొట్టమొదటి మహిళా ప్రధాన పాత్రలతో రూపొందుతున్న స్పై థ్రిల్లర్‌గా ఈ చిత్రం ప్రత్యేకతను సంతరించుకుంది. ఈ భారీ బడ్జెట్ చిత్రంలో బాలీవుడ్ కథానాయిక అలియా భట్, యువ నటి శర్వరి పవర్‌ఫుల్ పాత్రల్లో గూఢచారి ఏజెంట్లుగా కనిపించనున్నారు. వీరితో పాటు నటులు అనిల్ కపూర్, మరియు బాబీ డియోల్ కీలక పాత్రలు పోషిస్తున్నారు.

ఈ చిత్రాన్ని దర్శకుడు 'ది రైల్వే మెన్' ఫేమ్ శివ రావైల్ తెరకెక్కిస్తుండగా, ప్రముఖ నిర్మాత ఆదిత్య చోప్రా నిర్మిస్తున్నారు. సినిమా నాణ్యత విషయంలో ఎక్కడా రాజీ పడకూడదనే ఉద్దేశంతో, ముఖ్యంగా విజువల్ ఎఫెక్ట్స్ అద్భుతంగా వచ్చేలా చూడటానికి మేకర్స్ గతంలో అనుకున్న తేదీల నుంచి జూలైకి మార్చారు. నెట్‌ఫ్లిక్స్ వంటి దిగ్గజ ఓటీటీ సంస్థల నుంచి భారీ ఆఫర్లు వచ్చినప్పటికీ, ఈ యాక్షన్ విజువల్స్ వెండితెరపైనే చూడాలనే పట్టుదలతో నిర్మాతలు థియేట్రికల్ రిలీజ్‌కే మొగ్గు చూపారు.

బాక్సాఫీస్ వద్ద ఈ చిత్రం హాలీవుడ్ మూవీ 'మోనా' లైవ్-యాక్షన్ రీమేక్, ఇతర భారీ చిత్రాలతో పోటీ పడనుంది. స్పై యూనివర్స్‌లో పెద్ద స్టార్లు లేకుండా మహిళా ఏజెంట్లతో చేస్తున్న ఈ ప్రయోగంపై ప్రేక్షకుల్లో భారీ అంచనాలు నెలకొన్నాయి. ఈ సినిమా సక్సెస్ వైఆర్‌ఎఫ్ స్పై యూనివర్స్ భవిష్యత్తుకు అత్యంత కీలకం కానుంది.