హైదరాబాద్‌లో ఆసియాలోనే అతిపెద్ద 'డాల్బీ సినిమా' థియేటర్‌

భాగ్యనగర సినీ ప్రియులకు అద్భుతమైన వార్త! టాలీవుడ్ ఐకాన్ స్టార్ అల్లు అర్జున్, అల్లు స్టూడియోస్ కుటుంబానికి చెందిన 'అల్లు సినిమాస్', ఆసియాలోనే అతిపెద్ద డాల్బీ సినిమా థియేటర్‌ను ప్రారంభించేందుకు సిద్ధమైంది. అత్యాధునిక సాంకేతికతతో రూపొందిన ఈ థియేటర్, నగరంలోని సినిమా అనుభవాన్ని మరో స్థాయికి తీసుకెళ్లనుంది.

ఈ కొత్త థియేటర్‌లో స్క్రీన్ 1 ప్రత్యేకతగా ఉంటుందని తెలుస్తోంది. దీనిలో డ్యుయల్ 4కే డాల్బీ విజన్ లేజర్ ప్రాజెక్టర్లు, 108 నిట్స్ బ్రైట్‌నెస్, లోతైన బ్లాక్స్, 64-చానెల్ డాల్బీ అట్మాస్ సౌండ్ సౌకర్యం ఉంది. మొత్తం 644 స్టేడియం-స్టైల్ సీట్స్తో ఈ థియేటర్ ప్రేక్షకులకు అత్యంత విలాసవంతమైన సినిమా అనుభవాన్ని అందిస్తుంది. ఇది హైదరాబాద్‌లో మొదటి డాల్బీ సినిమాగా, ఇది భారతదేశంలోనే అత్యంత వెడల్పైన స్క్రీన్ కలిగిన థియేటర్‌గా రికార్డు సృష్టించింది.

త్వరలో ప్రారంభోత్సవం

ఈ అత్యాధునిక సినిమా హాల్ మార్చి 12న సాఫ్ట్ లాంచ్ కానుంది. ఈ కార్యక్రమానికి తెలంగాణ ముఖ్యమంత్రి ఎ. రేవంత్ రెడ్డి ముఖ్య అతిథిగా హాజరయ్యే అవకాశం ఉందని సమాచారం. మార్చి 19న విడుదల కానున్న 'ధురందర్: ది రివెంజ్' వంటి భారీ చిత్రాలతో ఈ థియేటర్ పూర్తిస్థాయిలో ప్రేక్షకులకు అందుబాటులోకి రానుంది.

హైదరాబాద్‌లో వస్తున్న ఈ సినిమా విప్లవంపై నెటిజన్లు సోషల్ మీడియాలో హర్షం వ్యక్తం చేస్తున్నారు. ఇప్పటికే 'బుక్‌మై షో'లో టిక్కెట్లు హాట్ కేకుల్లా అమ్ముడవుతున్నాయి. లగ్జరీ, అద్భుతమైన విజువల్స్ కావాలనుకునే వారికి అల్లు సినిమాస్ ఒక 'గేమ్ ఛేంజర్' కానుంది.